Mien plattdüütsch Eck / Dat Ammerländer Gröönkohlleed

Kultur | Sonstiges

Ammerland - 1. In Winterdag, hett dat erst fraarn, haalt wi in Ammerland Kohl ut 'n Gaarn,
een ganzen Körv vull un noch mehr,
dat Kohlhaaln nimmt kien Enn nich mehr. 

2. Kummt disse Gröönkohl in den Pott,
is dar för Swienkram ok noch Bott,
för Pinkel, Rippspeer, Speck un mehr,
de Swienkraam nimmt kien Enn nich mehr.

3. Steiht dat nu all up' usen Disch,
denn haut wi rin un weert ganz risch.
Baßt ok de Buuk, wi griept na mehr,
dat Rinhaun nimmt kien Enn nich mehr.

4. Un smeckt dat är, un smeckt dat üm,
denn spöhlt se't na - so'n Kohl will swemm'n -
mit Klaren, Doppelkoorn un Beer,
dat Naspöhln nimmt kien Enn nich mehr.

5, Dat Läwen is vull Quaal un Qualm,
man mit us Ollenborger Palm
hoolt wi't ut hunnert Jahr un mehr
un nimmt dat ok kien Enn nich mehr.

(Dat Leed wat na de Melodie:" Es war einmal ein treuer Husar" sungen!)

Överlewert

Woortverklaarn:
Bott=Platz; Rippspeer=Rippenstück;
risch=energisch;

Schlagworte: Kultur / sonstiges

Geschrieben auf: mein-edewecht.de